നടുക്കടലിൽ ലഹരിപ്പാർട്ടി; നടൻ ഷാരൂഖിന്റെ മകൻ ആര്യനും നടി ദാമേച്ചയുമടക്കം മൂന്നുപേരുടെ അറസ്റ്റ് രേഖപ്പെടുത്തി എൻ സി ബി :
മുംബൈ : നടുക്കടലിൽ ആഡംബര കപ്പലിൽ ലഹരി പാർട്ടി:കപ്പലിൽ എൻസിബി ഇന്നലെ നടത്തിയ പരിശോധനയിലാണ് ആര്യനുൾപ്പെടെ 8 പേരെ കസ്റ്റഡയിലെടുത്തത്.പാർട്ടിക്കിടയിലാണ് സംഘത്തെ കസ്റ്റഡിയിൽ എടുത്തത്.ഇതുമായി ബന്ധപ്പെട്ട് ബോളിവുഡ് സൂപ്പർതാരം ഷാരൂഖ് ഖാന്റെ മകൻ ആര്യൻ ഖാൻ, നടിയും മോഡലുമായ ദാമേച്ച, അർബാസ് മെർച്ചന്റ് എന്നിവരെ നർകോട്ടിക്സ് കൺട്രോൾ ബ്യൂറോ (എൻസിബി) അറസ്റ്റ് ചെയ്തു. വൈദ്യപരിശോധനയ്ക്ക് ശേഷം മൂവരെയും എൻസിബി ഓഫിസിൽ എത്തിച്ചു. ചോദ്യം ചെയ്യലിനു ശേഷം മൂന്നു പേരുടെ അറസ്റ്റാണ് രേഖപ്പെടുത്തിയതെന്ന് ദേശീയ മാധ്യമങ്ങൾ റിപ്പോർട്ട് ചെയ്തു
കപ്പലിൽനിന്ന് കൊക്കെയ്ൻ, ഹഷീഷ്, എംഡിഎംഎ ഉൾപ്പെടെ നിരവധി നിരോധിത ലഹരി മരുന്നുകൾ പിടിച്ചെടുത്തെന്ന് എൻസിബി അറിയിച്ചു.രണ്ടാഴ്ച മുൻപ് ഉദ്ഘാടനം ചെയ്ത കോർഡില ക്രൂസ് എന്ന ആഡംബര കപ്പലിലാണ് എൻസിബി പരിശോധന നടത്തിയത്. രഹസ്യ വിവരത്തിന്റെ അടിസ്ഥാനത്തിൽ, ശനിയാഴ്ച യാത്രക്കാരുടെ വേഷത്തിൽ കപ്പലിൽ കയറുകയായിരുന്നു. മുംബൈ തീരത്തുനിന്ന് നടുക്കടലിൽ എത്തിയപ്പോഴാണ് പാർട്ടി ആരംഭിച്ചത്. തുടർന്ന് കപ്പലിൽ ഉണ്ടായിരുന്ന എൻസിബി ഉദ്യോഗസ്ഥർ പാർട്ടിക്കിടെ പരസ്യമായി ലഹരി മരുന്ന് ഉപയോഗിച്ചവരെ അറസ്റ്റു ചെയ്തു.
