സചിന്‍ ബിര്‍ല ബി.ജെ.പിയില്‍; ഇതോടെ കോണ്‍ഗ്രസ് വിട്ടത് 27ാമത്തെ മധ്യപ്രദേശ് എം എൽ എ :
ഭോപാല്‍: മധ്യപ്രദേശിൽ നിന്ന് ഒരു എം എൽ എ കൂടി ബി ജെ പി യിൽ ചേർന്നു. സച്ചിൻ ബിർള യാണ് ബിജെപിയിൽ ചേർന്നത് .ഇതോടെ കഴിഞ്ഞ വര്‍ഷം മാര്‍ച്ച്‌ മുതല്‍ ഇതുവരെ 27ാമത്തെ എം.എല്‍.എയാണ് മധ്യപ്രദേശില്‍ കോൺഗ്രസ്സിൽ നിന്ന് ബിജെപി യിൽ എത്തുന്നത്.
2020 മാര്‍ച്ചില്‍ ജ്യോതിരാദിത്യ സിന്ധ്യയുടെ നേതൃത്വത്തില്‍ ആറ് കാബിനറ്റ് മന്ത്രിമാര്‍ ഉള്‍പ്പെടെ 22 കോണ്‍ഗ്രസ് എം.എല്‍.എമാര്‍ പാര്‍ട്ടിയില്‍ നിന്ന് രാജിവച്ച്‌ ബി.ജെ.പിയില്‍ ചേര്‍ന്നിരുന്നു. പിന്നീട് നാല് കോണ്‍ഗ്രസ് എം.എല്‍.എമാര്‍ കൂടി ബി.ജെ.പിയില്‍ ചേര്‍ന്നു.ഖണ്ട്വ ലോക്സഭ ഉപതെരഞ്ഞെടുപ്പ് റാലിയില്‍ വെച്ച്‌ മുഖ്യമന്ത്രി ശിവ്രാജ് സിങ് ചൗഹാന്‍റെ സാന്നിധ്യത്തിലാണ് സചിന്‍ ബിര്‍ല ബി.ജെ.പിയില്‍ ചേര്‍ന്നത്.
‘2020 മാര്‍ച്ചില്‍ കോണ്‍ഗ്രസ് സര്‍ക്കാര്‍ വീണ ശേഷം, വല്ലഭ ഭവനില്‍ വെച്ച്‌ തന്‍റെ പേര് വിളിച്ച്‌ മുഖ്യമന്ത്രി ശിവരാജ് സിംഗ് ചൗഹാന്‍ സംസാരിക്കുകയും മണ്ഡലത്തിലെ വികസന പ്രശ്നങ്ങള്‍ ക്ഷമയോടെ കേള്‍ക്കുകയും ചെയ്തപ്പോള്‍ താന്‍ ആശ്ചര്യപ്പെട്ടു. ഇപ്പോള്‍ 55 ഗ്രാമങ്ങളില്‍ വികസന പ്രവര്‍ത്തനങ്ങള്‍ നടക്കുന്നു” -ബിര്‍ല പറഞ്ഞു.
