തൃശൂര്‍ : മുഖ്യമന്ത്രി പിണറായി വിജയനെതിരെ വിമര്‍ശനവുമായി വടകരയിലെ നിയുക്ത എംപി കെ മുരളീധരൻ. അവസാനത്തെ സിപിഎം മുഖ്യമന്ത്രിയാകാൻ പിണറായി വിജയൻ തീരുമാനിച്ചു. സിപിഎമ്മിന്‍റെ അടിയന്തിരം കണ്ടിട്ടേ പിണറായി പോകുകയുള്ളൂവെന്നും മുരളീധരൻ പറഞ്ഞു. കേന്ദ്ര-സംസ്ഥാന സര്‍ക്കാരിനെതിരെയുള്ള ജന വികാരമാണ് കേരളത്തിലുണ്ടായത്.
ശബരിമല വിഷയം സംസ്ഥാന സര്‍ക്കാരിന് എതിരായെന്നും അദ്ദേഹം പറഞ്ഞു. ഭരണത്തിൽ ഇനി തുടരണോയെന്ന് പിണറായിയാണ് തീരുമാനിക്കേണ്ടത്. 2004 ൽ യുഡിഎഫ് തിരിച്ചടി നേരിട്ടപ്പോള്‍ മുഖ്യമന്ത്രി എ കെ ആൻ്റണി രാജിവച്ചു. ഇത് വേണമെങ്കിൽ പിണറായിക്കും പിന്തുടരാം. എന്നാൽ അദ്ദേഹത്തിൽ നിന്ന് ഇത് പ്രതീക്ഷിക്കുന്നില്ലെന്നും മുരളീധരൻ പറഞ്ഞു. രാജ്യത്ത് സിപിഎം അവശേഷിക്കുന്നത് കേരളത്തിൽ മാത്രമാണ്. ഇവിടുത്തെ അടിയന്തരം കണ്ടിട്ടേ പിണറായി ഒഴിയുകയുള്ളൂ. അവസാനത്തെ സിപിഎം മുഖ്യമന്ത്രിയാകാൻ പിണറായി വിജയൻ തീരുമാനിച്ചുവെന്നും അദ്ദേഹം കുറ്റപ്പെടുത്തി.
